今時今日，返工其中一個主要嘅課題，係點樣 deal with 「新香港人」。無論係海歸定係從北方原裝入口，佢哋始終有著唔同嘅成長經歷，價值觀同一般香港人有出入。點樣相處融洽，或者至少和睦共處，需要多多少少嘅智慧。
Rule of Thumb 大概係，唔好嘗試改變佢哋。雖然係職場上，上司係有責任去管教好下屬，不過唔係人人受教，文化出身唔同嘅大陸同事，更加唔可能從骨子裡作出改變。如果佢哋肯改下少少行為上嘅習性、修飾下少少言行舉止，已經算係執到。
有謂「知己知彼」，如果你有能力了解佢哋諗緊乜，個腦係咩構造，往後嘅日子會比較容易過。置記有同事會嘗試取信於人，唔係做郵差去收信，只係著力建立大陸同事對自己嘅尊重同信任，從而建立夥伴關係。畢竟大陸人喺香港仍然係人在異鄉 (唔信你搵個問下佢喺邊度嚟？吉林定江西？) ，孤單、寂寞、凍係在所難免嘅，如果有本地人以適當嘅身段 (我冇話放低或者抬高，自己執生) 去接觸佢哋，未嘗唔係一件好事。
Search